САД го продолжија рокот за купување на купување на имотот на рускиот „Лукоил“

Соединетите Американски Држави го продолжија рокот за финализирање на преговорите за купување на имотот на руската нафтена компанија Лукоил до 17 јануари, соопшти американското Министерство за финансии. Според општата дозвола издадена од Канцеларијата за контрола на странската имотна сопственост (OFAC), договорите за продажба може да се склучуваат до 17 јануари 2026 година.

Продолжувањето на рокот важи исклучиво за трансакции чија реализација е „изречно условена“ со добивање посебна дозвола од OFAC. Крајот на октомври Министерството за финансии воведе санкции кон Лукоил и Роснефт со цел да ги ограничи руските финансиски капацитети за водење воена операција во Украина.

Набргу по санкциите, Лукоил соопшти дека планира да ја продаде својата меѓународна имотна сопственост и дека ја прифатил понудата на швајцарскиот трговец со суровини „Гунвор“. Но, почетокот на ноември донесе пресврт, Гунвор ја повлече понудата откако Вашингтон јасно стави до знаење дека нема да му издаде дозвола за деловно работење.

Во средината на минатиот месец OFAC веќе го продолжи рокот за финализирање на продажбата до 13 декември, а најновата одлука повторно дава дополнително време за можни купувачи.

Меѓународниот огранок на Лукоил, со седиште во Виена, располага со рафинерии во Бугарија, Романија и Холандија, удели во нафтени полиња во Казахстан, Узбекистан, Ирак, Мексико, Гана, Египет и Нигерија, како и мрежа на бензински станици во 20 земји, меѓу кои и Хрватска и САД. Вредноста на оваа меѓународна имотна структура се проценува на околу 22 милијарди долари, пренесува Reuters.

Според медиумски извештаи, интерес за купување на странскиот имот на Лукоил покажале повеќе компании, меѓу кои американските гиганти Chevron и ExxonMobil, инвестициската фирма Carlyle, како и државната нафтена компанија на Абу Даби – ADNOC, и конгломератот International Holding Company од ОАЕ. Неименувани извори наведуваат дека интерес изразил и унгарскиот MOL, особено за рафинериите и бензинските станици во Европа, како и за уделите во наоѓалиштата во Казахстан и Азербејџан.