Skip to content
Сè што пожарникарите во Лос Анџелес постигнаа со надчовечки напори во изминатите денови е под закана да пропадне, откако прогнозата ги вознемири сите во САД. Целиот град се подготвува за најлошото – силни ветрови и „експлозивен раст на нови пожари“, пренесува „Њујорк Тајмс“.
Десетици илјади евакуирани бараат засолниште
Оваа ситуација дополнително го влошува веќе сериозниот недостиг на простор за привремено сместување во Лос Анџелес.
Шефицата на пожарникарската служба во Лос Анџелес, Кристин Кроули, изјави дека нејзините екипи се подготвени за налетите на силни ветрови кои можат да го зголемат ризикот од пожари.
„Ударните возила и неопходната механизација се распоредени низ градот за брза реакција“, истакна Кроули, додавајќи дека „опасноста сè уште не е помината“ и ги повика жителите да ги почитуваат наредбите за евакуација.
Ветровите ја влошуваат ситуацијата
Очекуваните силни налети на ветер можат дополнително да ги разгорат двата големи шумски пожари, кои веќе уништија цели населби, однесоа најмалку 24 животи и опустошија територија со големина на Вашингтон.
Метеорологот Дејвид Рот објасни дека сувите и опасни ветрови од Санта Ана досега достигнале брзини од 48 до 80 км/ч, но се очекуваат удари до 120 км/ч во текот на ноќта.
Повеќе од 8.500 пожарникари се борат со пожарите од воздух и од земја, обидувајќи се да го спречат нивното ширење. Шерифот на округот Лос Анџелес, Роберт Луна, изрази длабока загриженост поради временските услови и претстојните налети на ветер.
Издадени предупредувања за екстремна опасност
Националната метеоролошка служба издаде предупредување за „екстремна опасност од пожари“, покривајќи ја областа од Сан Луис до Лос Анџелес. Според „Њујорк Тајмс“, ветровите можат да предизвикаат „експлозивен раст на пожари“, создавајќи ретка „посебно опасна ситуација“.
Организаторите на доделувањето на Оскарите го одложија објавувањето на номинациите, а традиционалниот ручек на Академијата за филмски уметности и науки беше откажан.
Пожарите уништија или оштетија над 12.000 објекти, оставајќи апокалиптичен пејзаж од пепел и рушевини.
Пожарот во Палисејдс, кој ги зафати луксузните населби на западниот раб на градот, моментално е под контрола во 14%, додека пожарот во подножјето на планината Сан Габриел е контролиран со 33%. Третиот пожар северно од градот е изгаснат 95%, а останатите три пожари во округот се целосно совладани.
