Skip to content
Според најновата анкета на агенцијата „Вариан“, спроведена по нарачка на данскиот „Берглинске“ и гренландскиот „Сермицук“, мнозинството жители на Гренланд не поддржуваат отцепување од Данска и припојување со САД.
Ова е сериозен удар за американскиот претседател Доналд Трамп, кој веднаш по преземањето на функцијата на 20 јануари ги засили напорите за ставање на Гренланд под американска управа.
Според резултатите, 85% од анкетираните се против присоединување кон САД, додека 6% би прифатиле таква можност. Околу 9% се неодлучни.
Трамп инсистира Гренланд да дојде под американска контрола, наведувајќи безбедносни причини, а не ја исклучува ни употребата на сила. Тој тврди дека населението на островот го поддржува.
„Луѓето во Гренланд не се задоволни со Данска. Верувам дека повеќе сакаат да бидат со нас“, изјави Трамп на 21 јануари.
Но, ова не го делат лидерите на Гренланд, кои повеќе се наклонети кон независност.
„Не сакаме да бидеме Данци, не сакаме да бидеме Американци – сакаме да бидеме Гренландци“, порача премиерот на островот, Муте Б. Егеде.
Данска, пак, настојува да избегне ескалација со Трамп. Премиерката Мете Фредериксен моментално е во дипломатска офанзива низ Европа, барајќи поддршка од сојузниците за заштита на територијалниот интегритет на кралството.
Анкетата е спроведена онлајн од 22 до 26 јануари, на репрезентативен примерок од 497 граѓани постари од 18 години, со можен статистички отстап од 3,1%.
Дополнително, 45% од Гренландците го сметаат американскиот интерес за закана, а само 8% би прифатиле американско државјанство доколку мораат веднаш да изберат меѓу дански и американски пасош.
