Skip to content
Севернокорејскиот лидер Ким Џонг Ун посети фабрика за муниција, каде што тестираше пиштоли и го надгледуваше производството на огнено оружје, објави државната новинска агенција КЦНА.
Фотографиите објавени од КЦНА го покажуваат Ким како го обиколува објектот со својата ќерка Џу Ае, која учествуваше во вежба за гаѓање со воени претставници.
За време на посетата, Ким повика на модернизација на производствените процеси и проширување на капацитетот на фабриката „на далекусежен начин“, нагласувајќи дека тоа помага да се зголеми борбената ефикасност на војската, објави Ројтерс.
КЦНА потсети дека Ким неодамна го надгледувал тестот за лансирање на стратешка крстосувачка ракета од новолансиран разурнувач.
Националната разузнавачка служба (НИС) на Јужна Кореја соопшти дека има знаци дека Џу Ае веќе придонесува во политичките работи и се шпекулира дека се подготвува за потенцијална внатрешна номинација за наследник на шефот на државата.