Skip to content
Заменик-генералната секретарка на НАТО Радмила Шекеринска присуствуваше на неформалниот состанок на министрите за одбрана на ЕУ во Варшава, чиј домаќин беа високиот претставник/потпретседател на ЕУ Каја Калас и полскиот министер за одбрана Владислав Косињак-Камиш, заедно со украинскиот министер за одбрана Рустем Умеров.
На состанокот Шекеринска истакнала дека обезбедувањето траен мир за Украина е од суштинско значење за европската безбедност и за глобалната стабилност. Таа повика на зајакната поддршка за Украина, сега и на долги патеки, истакнувајќи дека за мирот да биде траен, Украина мора да остане силна.
Заменик-генералната секретарка на Алијансата ги поздрави неодамнешните најави на сојузниците на НАТО за дополнителна помош за Украина, вклучувајќи воздушна одбрана, оклопни возила, беспилотни летала и муниција. НАТО, исто така, помага долгорочно да се зајакнат вооружените сили на Украина, вклучително и преку финансиска поддршка, безбедносна помош и обука на НАТО за Украина (НСАТУ) и новиот центар за обука и едукација за заедничка анализа НАТО-Украина во Полска.
Радмила Шекеринска ја пофали соработката НАТО-ЕУ, како во Брисел, така и на терен, каде НСАТУ тесно соработува со Мисијата на ЕУ за воена помош за Украина (ЕУМАМ) за да се насочи меѓународната поддршка за Украина. Таа ги поздрави неодамнешните иницијативи на ЕУ за одбраната и истакна дека разговорите НАТО-ЕУ ќе продолжат со високата претставничка/потпретседател Каја Калас, на претстојниот состанок на министрите за надворешни работи на НАТО.
