Skip to content
Кинескиот онлајн трговец Шејн (Shein) ги зголеми цените на своите производи за потрошувачите во САД и до 377 отсто, пред воведувањето на американските царини на помалите пакети.
Поскапувањата варираат во зависност од категориите. Производите за убавина и здравје поскапеле за 51 отсто, додека женската облека е поскапена за 8 отсто, пренесува Блумберг.
За домашни и кујнски производи, како и играчки, просечниот раст на цените бил повеќе од 30 отсто, а најголемото поскапување било кај 10-делниот сет кујнски крпи, кој поскапел за неверојатни 377 отсто.
Кинеските онлајн платформи Шејн и Тему се соочуваат со царина од 120 отсто на многу од своите производи поради одлуката на американската влада да го укине изземањето за мали пакети од континентална Кина и Хонг Конг.
Според претходните правила, стоката со вредност помала од 800 долари можела да влезе во САД без царини.
Истовремено, властите во Вашингтон ќе ја зголемат таксата за поштени испратеници за стоката што влегува во САД по 2 мај на 100 долари, а оваа такса ќе биде дополнително зголемена по 1 јуни.
Американскиот претседател Доналд Трамп изјави на 21 април дека во САД „практично нема инфлација“ поради падот на цените на енергијата и основните намирници, но кинеските онлајн трговци наскоро може да ги пренесат дополнителните трошоци на американските потрошувачи, предупредува нјујоршката агенција.
