Skip to content
На Меѓународниот ден на шумите, 21 март 2025 година, ФАО ја истакнува важноста на шумите за обезбедување храна, исхрана и егзистенција на руралните заедници.
Во едиторијалот по повод овој ден, Виорел Гуту, Помошник генерален директор на ФАО и Регионален претставник за Европа и Централна Азија, порачува:
„Шумите не се само резерва на дрвна маса – тие се и извор на храна. Меѓународниот ден на шумите 2025 година го слави клучниот придонес на шумите за глобалната безбедност со храна и исхраната.“
Недрвните шумски производи – како што се јаткасти плодови, бобинки, печурки, месо од дивеч, лековити растенија и шумски мед – се основа или значаен додаток во исхраната на многу луѓе. Во Европа, 90% од домаќинствата редовно консумираат барем еден од овие производи, а една третина на годишно ниво собираат недрвни шумски производи, било за лична употреба или продажба.
Шумите играат клучна улога во обезбедувањето на алтернативни извори на приход во време на кризи, како што се неуспешни жетви или конфликти, и многу често се животна линија за руралните заедници. Месото од дивеч е особено значајно како извор на протеини, микронутриенти и пониска содржина на масти, без антибиотици.
Сепак, економската вредност на овие производи не е доволно препознаена во официјалните статистики, бидејќи многу од нив се дел од неформалната економија.
ФАО, основана во 1945 година, продолжува да работи на борбата против гладта и поддршката на руралните заедници, со шумите како незаменлив партнер во создавањето одржливи и отпорни агро-прехранбени системи.
„Зачувајте ги шумите не само на 21 март, туку секој ден во годината, за идните генерации!“ – додава Гуту.
