Skip to content
Дводневните разговори меѓу кинескиот и американскиот претседател, Си Џинпинг и Доналд Трамп во Пекинг, можеби отворија врата за нова ера во односите меѓу двете светски суперсили.
На крајот од турнејата на американскиот претседател, Си рече дека постигнале „нов билатерален однос“ и вети дека ќе му ги испрати на Трамп семките од кинески рози што шефот на Белата куќа ги восхитувал за време на прошетката во градината Џонгнанхај во Пекинг.
„Треба да бидеме партнери, а не соперници“, рече Си Џинпинг на крајот од дводневната посета на Трамп на Пекинг.
Трамп рече дека трговските разговори поминале „подобро од минатиот пат“ и дека бизнис лидерите што дојдоа со него во Пекинг биле таму за да „склучат договори“ и „да вратат работни места“.
Тој исто така рече дека имаат слични ставови за Иран.
Непосредно пред двајцата претседатели да прошетаат низ импресивната градина, „Фокс њуз“ емитуваше интервју со Трамп, во кое тој рече дека Си ветил дека нема да го снабдува Иран со воена опрема.
„Но, во исто време, тој рече дека тие купуваат многу нафта од Иран и дека би сакале да продолжат“, додаде американскиот претседател.
Во истото интервју, Трамп исто така рече дека Кина се согласила да купи американска нафта и 200 авиони „Боинг“.
Кинескиот претседател ја нарече посетата на Трамп „историска и значајна“ и рече дека тие воспоставиле „нова позиција за конструктивен стратешки и стабилен однос“ меѓу двете земји.
„Претседателот Трамп се надева дека повторно ќе ја направи Америка голема, а јас сум посветен на водење на кинескиот народ кон постигнување на големо подмладување на кинеската нација“, рече тој во обраќањето.
Трамп рече дека посетата била „многу успешна и незаборавна“.
Тој го нарече Си „мој стар пријател“.
„Имам голема почит кон него“, додаде тој.
Трамп исто така спомена дека Си Џинпинг ќе ја врати посетата и ќе дојде во САД на 24 септември.
„Исто како што трговските односи се реципрочни, така и посетата ќе биде реципрочна“.
„Се надевам дека ќе си заминете (од САД) многу импресионирани, како што и јас сум многу импресиониран од Кина“, му рече Трамп на Си.
„Подготвен сум да одржувам отворена и длабинска комуникација со претседателот Си Џинпинг и со нетрпение очекувам да го угостам во Вашингтон“, додаде американскиот претседател.
„Кој друг беше тука?“ го праша Трамп Си
Прво, му го покажа Храмот на небото, едно од најважните места во богатата историја и култура на Кина, а Трамо е само вториот американски претседател кој го видел во живо, по Џералд Форд во 1975 година.
На вториот ден од посетата, двајцата претседатели се прошетаа низ градината на која Кина е горда.
„Може ли да го прашам претседателот: дали тој носи други државници, претседатели или премиери, тука?“ праша Трамп, додека тој и Си стоеја со своите преведувачи во Џонгнан.
„Многу малку“, одговори Си.
„Обично, ние не одржуваме дипломатски настани тука. Дури и откако почнавме да ги организираме, тоа е сè уште исклучително ретко“, додаде кинескиот претседател.
„На пример, Путин беше тука“, додаде Си.
Рускиот претседател го посети Џонгхај неколку пати за време на претходните посети на Кина.“
„Добро. „Ми се допаѓа тоа“, рече Трамп.
Додека разговараа, Трамп во еден момент застана и коментираше: „Ова се најубавите рози што сум ги видел во мојот живот“.
И кога отидоа на чај, се слушна како Си му кажува дека ќе му даде семе од роза да ги засади во дворот на Белата куќа.
