Словачката рафинерија „Словнафт“ до 2027 ќе го намали увозот на руска нафта: Инвестиции од 200 милиони долари за технолошка трансформација

Словачката нафтена рафинерија „Словнафт“ интензивно работи на намалување на својата зависност од руска сурова нафта, во рамки на сеопфатна програма за диверзификација на снабдувањето. Иако моментално 75 до 80 проценти од преработената сурова нафта потекнува од Русија, рафинеријата планира до 2027 година значително да го зголеми уделот на алтернативни извори, со цел да стане флексибилна и отпорна на геополитички ризици.

На средба со меѓународни новинари, компанијата објави дека оваа стратегија бара сериозни технолошки подобрувања и инвестиции од околу 200 милиони долари. Средствата ќе бидат наменети за модернизација на постојната опрема, замена на металуршките цевководи и надградба на клучните постројки во рафинеријата.

„За да можеме да преработуваме сурова нафта со различен хемиски состав, мора да ја адаптираме технологијата. Оваа инвестиција ќе ни овозможи поголема независност од еден снабдувач и ќе ја зголеми оперативната сигурност на рафинеријата“, изјави Мартина Валачовичова, експерт за развој на технологија во „Словнафт“.

Историски гледано, „Словнафт“ е проектирана специјално за преработка на руска сурова нафта, која пристигнува преку нафтоводот „Дружба“. Но, во последните пет години, рафинеријата успешно тестирала и преработила 14 видови сурова нафта од 10 различни земји, меѓу кои Азербејџан, Саудиска Арабија, Гвајана, како и држави од Европа и Северна Америка.

Според директорот за производство Бранислав Винтер, компанијата и покрај диверзификацијата, сè уште се соочува со предизвици, особено поради високите транзитни такси за нафтоводот „Адрија“ од Хрватска, кои ја ограничуваат исплатливоста на увозот на алтернативна нафта.

Во меѓувреме, „Словнафт“ развива и иновативни решенија во производството на одржливи горива. Компанијата успешно тестирала производство на биодизел од лушпи од индиски ореви, увезени од Азија, како и од искористено масло за готвење. Иако овие производи не се наменети за авијација, рафинеријата паралелно експериментира и со производство на SAF горива (Sustainable Aviation Fuel), во согласност со европските регулативи кои од 2024 година бараат најмалку 2% од авио-горивата да бидат од одржлив извор.

Словачката рафинерија годишно преработува околу шест милиони барели сурова нафта и произведува широк спектар на нафтени деривати, хемикалии, мазива и полимери кои се користат во различни индустрии, вклучувајќи и 3D печатење.

Оваа година, „Словнафт“ одбележува 130 години од основањето на првата рафинерија за минерално масло во регионот — Аполо. По уништувањето за време на Втората светска војна, модерната рафинерија била изградена во 1950-тите, а од 2004 година мнозински сопственик е унгарската енергетска групација „Мол“.