Стармер по состанокот во Париз: Разговараме за иднината на Европа како целина, не само за Украина

Премиерот на Обединетото Кралство Кир Стармер по самитот на Европските лидери во Париз дече дека во моментов не се разговара само за иднината на Украина, туку за Европа како целина, што е од витално значење за националниот интерес на Велика Британија.

Ова е момент за колективната безбедност на Европа кој доаѓа еднаш во секоја генерација, вели тој, додавајќи дека само траен мир во Украина кој го заштитува нејзиниот суверенитет ќе го одврати Путин од натамошна агресија во иднина.

Неодамнешните изјави на американската администрација не треба да бидат изненадување, вели тој, додавајќи дека претседателот Трамп одамна изразил желба Европа да се засили и да ги исполни барањата на сопствената безбедност и дека сака да постигне траен мировен договор за ставање крај на војната во Украина.

Денешниот состанок беше „витален прв чекор во одговорот на тој предизвик“, вели Стармер.

Британскиот премиер исто така додаде дека мора да има и заштита од САД затоа што „американската безбедносна гаранција е единствениот начин ефикасно да се одврати Русија од повторно напад на Украина“.

Стармер вели дека следната недела ќе оди во Вашингтон за да се сретне со Трамп и да разговара за клучните елементи за траен мир.

Тој вели дека „предвидуваме натамошна средба со европските колеги кога ќе се вратам од САД“, а ќе разговара и со Зеленски во наредните денови.

„Мораме да ја препознаеме новата ера во која се наоѓаме, а не безнадежно да се држиме за удобностите од минатото.“

За Украина „ние сме во многу рана фаза на процесот“, вели тој, додавајќи „Европа мора да ја одигра својата улога“, повторувајќи дека е подготвен да размисли за ангажирање на силите на Обединетото Кралство на теренот заедно со другите, доколку има траен мировен договор.