Стотици ЛГБТК+ католици учествуваа на поклонение во Рим по повод Светата година

Стотици католици од ЛГБТК+ заедницата, заедно со членовите на нивните семејства, денеска присуствуваа на поклонение во Рим по повод Светата или Јубилејната година, која е посветена на надежта.

Поклонението беше организирано како симбол на поголемо прифаќање на ЛГБТК+ верниците во Католичката црква, промена која многумина ја припишуваат на поранешниот папа Франциск.

Миса за учесниците служеше бискупот Франческо Савино, потпретседател на Италијанската бискупска конференција, во преполната језуитска црква во Рим. Неговите зборови за јубилејните години како време за прошка на долгови и враќање на надежта на маргинализираните беа поздравени со овации од присутните.

Поклонението беше организирано од италијанската организација „Jonathan’s Tent“ и американската група „Outreach“, основана од језуитскиот свештеник Џејмс Мартин. Настанот беше вклучен во официјалниот календар на Ватикан за Светата година, но организаторите нагласија дека тоа не значи поддршка или спонзорство од страна на Ватикан.

Папата Лав XIV одржа посебна аудиенција за сите аџии во Рим, без посебно да ја спомне ЛГБТК+ заедницата. Верниците се очекува да поминат низ Светите врата на Базиликата „Свети Петар“.

Светата година, која се одржува еднаш на секои 25 години, ги повикува верниците на аџилак во Рим, а оваа година е посветена на темата надеж.