Телото на жената предадено од Хамас не е мајката на киднапираните и убиени деца

Израелската војска потврди дека телата на киднапираните Израелци Одед Лифшиц и браќата Ариел и Кфир Бибас беа идентификувани откако Хамас ги предаде нивните тела на Израел. Меѓутоа, женското тело што групата го испрати не е телото на Шири Силберман Бибас, мајката на киднапираните момчиња.

Согласно соопштението на израелската војска (ИДФ), специјалистите од Институтот за судска медицина не успеале да го идентификуваат четвртото тело, а ИДФ нагласи дека Хамас го прекршил договорот за прекин на огнот со овој потег, бидејќи бил обврзан да ги врати телата на четирите мртви заложници.

„Го молиме Хамас да ја врати Шири и сите наши заложници. Ние сочувствуваме со семејството Бибас во овој тежок момент и ќе продолжиме да вложуваме максимални напори за да ги вратиме Шири и сите заложници што е можно поскоро“, се вели во соопштението на израелската војска.

На церемонијата организирана од Хамас, едно од четирите тела беше означено како телото на Шири Бибас, со нејзината фотографија и име на хебрејски и арапски, како и датумот на нејзиното киднапирање на 7 октомври 2023 година.