Трагедија во Лисабон: Најмалку 15 загинати на култната жичница „Глорија“

Најмалку 15 лица загинаа, а 18 се повредени откако култната жичница „Глорија“ во Лисабон излета од шините и се урна, соопштија службите за итни случаи. Пет повредени се во критична состојба, додека останатите 13, меѓу кои и едно дете, имаат полесни повреди.

Инцидентот се случил околу 18:05 часот во близина на Авенија да Либердаде. Според првичните информации, уште не е утврден точниот причинител на несреќата, иако локалниот весник Observador јавува дека се откинал кабелот на жичницата, што довело до губење на контрола и судир со блиска зграда.

62 припадници на службите за итни случаи и 22 возила интервенирале на местото на несреќата. Некои патници биле заробени, но сите се ослободени.

Жичницата „Глорија“, која е една од најпознатите туристички атракции во Лисабон, го поврзува плоштадот Restauradores со калдрмисаните улици на квартот Bairro Alto на растојание од 275 метри, а патувањето трае околу три минути. Иако ја користат и локалните жители, жичниците се особено популарни меѓу туристите.

Очевидци велат дека во моментот на несреќата патниците биле уплашени и се обидувале да се спасат, додека службите за итни случаи реагирале за само пет до десет минути.