Skip to content
Американскиот претседател Доналд Трамп ја запре примената на новиот пакет санкции кон Русија, два дена пред предвидениот почеток на 18 октомври. Со извршна наредба потпишана во петокот, тој се повика на националните интереси на САД, иако самиот го потпиша законот во септември.
Трамп ја искористи одредбата што му дозволува да одобри изземање од санкциите, ограничувањата и царините, со доставување образложение до Конгресот. Според наредбата објавена од Белата куќа, изземањата ќе важат додека претседателот или надлежните членови на администрацијата не утврдат дека се потребни дополнителни мерки.
Одлуката не значи укинување на сите американски санкции кон Москва. Во документот изречно е наведено дека остануваат непроменети мерките воведени со претходни извршни наредби за штетни активности на руската влада.
Новиот закон, именуван по сенаторот Линдзи Греам, беше усвоен со поддршка од двете партии. Неговата цел беше да ги ограничи финансиските извори за руската војна против Украина преку мерки насочени кон руски функционери, банки и танкерите што се користат за заобиколување на ограничувањата за извоз на енергенси.
Потегот следува една недела по најавата на Трамп за договор за набавка на руски дизел, со кој, според него, треба да се намалат светските цени на горивата. Белата куќа не објави веднаш детално јавно образложение зошто запирањето на новите санкции е во национален интерес.
Одлуката предизвика критики во Конгресот. Демократскиот конгресмен Дон Баер оцени дека Трамп му попушта на Владимир Путин и ја поткопува намерата на законодавците да ја казнат Русија за војната против Украина.
