Skip to content
Новоизбраниот американски претседател Доналд Трамп објави дека поранешниот главен оператвен директор на „PayPal“ и подкастер, Дејвид Сакс, ќе стане „цар за вештачка интелигенција и криптовалути“ во неговата администрација.
„Дејвид ќе се фокусира на тоа Америка да стане глобален лидер во двете области. Тој ќе ја брани слободата на говорот на Интернет и ќе нè оддалечи од предрасудите и цензурата на големите технолошки компании,“ истакна Трамп преку својата платформа Truth Social.
Сакс, близок соработник на милијардерот Илон Маск, ќе раководи со напорите за создавање правна рамка која ќе го поттикне развојот на криптовалутите и ќе ја зајакне американската позиција во светскиот пазар на вештачка интелигенција. Покрај тоа, тој ќе го води советодавниот одбор за наука и технологија на новиот претседател.
Трамп, исто така, назначи Пол Аткинс, познат поддржувач на дигиталните валути, за шеф на американската Комисија за хартии од вредност. Оваа политика предизвика раст на цената на биткоинот, кој ја надмина границата од 100.000 долари, поттикнувајќи еуфорија меѓу инвеститорите.
Илон Маск, кој активно ја поддржа кампањата на Трамп, исто така доби улога во идната администрација, предводејќи го владиниот оддел за ефикасност. Трамп ја продолжува практиката на наградување на големите донатори, што предизвика реакции во јавноста.
