Skip to content
Американскиот претседател Доналд Трамп и украинскиот лидер Володимир Зеленски повторно влегоа во отворен судир околу начинот на кој треба да се стави крај на војната во Украина.
Главната точка на раздор е ставот на Киев да не ја признае руската анексија на Крим. Потпретседателот на САД, Џеј Ди Венс, во изјава од Индија порача дека е време Москва и Киев да прифатат американски мировен предлог или САД да се повлечат од преговарачкиот процес. Според него, планот предвидува замрзнување на фронтот според сегашните линии и долгорочен дипломатски аранжман.
Зеленски останува цврст на ставот дека Крим е украинска територија и дека нема што да се преговара во врска со тоа, бидејќи е спротивно на уставот на Украина. Трамп, пак, изјави дека „Крим е изгубен одамна“ и дека неговото враќање не е тема на дискусија. Претседателот на САД остро го укори Зеленски, обвинувајќи го дека со неговите „инфламаторни изјави“ го отежнува мировниот процес. Во март, двајцата лидери се расправаа и во Овалната соба во Белата куќа, каде Трамп му порача дека не разбира како Украина не се борела за Крим уште во 2014 година.
Паралелно, мирот беше тема и на неодамнешните разговори во Лондон, каде присуствуваа претставници од САД, Украина и европски земји. Американскиот државен секретар Марко Рубио ја откажа својата посета, поради што беше откажан и поширокиот состанок со министрите за надворешни работи од Британија, Франција и Германија. Иако британската влада ги минимизираше последиците од откажувањето, европските дипломати потврдуваат дека предлогот на американскиот специјален пратеник Стив Виткоф бара повеќе отстапки од Украина отколку од Русија, вклучувајќи и признавање на анексијата на Крим.
САД исто така предложиле почетно укинување на санкциите кон Русија и отфрлање на украинското членство во НАТО – предлози кои се неприфатливи не само за Киев туку и за повеќето европски сојузници. Украина, според дипломатски извори, доставила документ до ЕУ во кој јасно се наведува дека нема да се разговара за територијални прашања сè додека не се постигне целосен и безусловен прекин на огнот.
И покрај притисокот од Вашингтон, украинската влада истакна дека ќе продолжи да работи со САД за праведен и траен мир – но не по цена на нејзиниот суверенитет.
