Skip to content
Американскиот претседател Доналд Трамп изјави дека американските воени бродови повторно се полнат со најдобро оружје како подготовка за продолжување на нападите врз Иран доколку мировните преговори во Пакистан не успеат. Изјавата доаѓа во момент кога потпретседателот Џеј Ди Венс замина за Исламабад на завршни мировни преговори.
Во пакистанската престолнина на Венс ќе му се придружат специјалниот пратеник Стив Виткоф и зетот на Трамп, Џаред Кушнер. Преговорите следуваат по двонеделниот прекин на огнот договорен во вторник. На прашањето дали верува во успехот на преговорите, Трамп изјави: „Ќе знаеме за околу 24 часа. Наскоро сè ќе биде јасно.“
„Подготвени сме за нов почеток. Ги полниме бродовите со најдоброто оружје – најдобро некогаш направено, дури и подобро од она со кое претходно ги уништивме“, изјави Трамп.
Се очекува преговорите да се фокусираат на американското барање Иран да предаде околу 450 килограми збогатен ураниум, кој наводно е длабоко закопан, како и повторно отворање на Ормускиот теснец за меѓународен сообраќај. Трамп нагласи дека повторното отворање на теснецот е клучен дел од секој договор за примирје.
Други важни теми се прекинот на иранската поддршка за регионалните сојузници, статусот на ракетната програма и барањето на Техеран за укинување на американските санкции.
Иранската делегација во Исламабад ја предводат министерот за надворешни работи Абас Арагчи и претседателот на парламентот Мохамед Бакер Калибаф. Арагчи претходно тврдеше дека Иран има „неотуѓиво право“ на збогатување ураниум.
„Имаме работа со луѓе за кои не знаеме дали ја зборуваат вистината или не“, рече Трамп. „Во лице ни кажуваат дека се откажуваат од нуклеарното оружје, а потоа излегуваат пред новинарите и велат дека сакаат збогатување. Ќе видиме.“