Skip to content
Американскиот претседател Доналд Трамп објави дека САД ги прекинуваат сите трговски разговори со Канада, откако северниот сосед најави воведување на данок на дигитални услуги што ќе ги погоди американските технолошки компании.
Во објава на неговата платформа Truth Social, Трамп го нарече потегот „директен и очигледен напад“ врз САД, додавајќи дека Канада со години им наплаќала на американските земјоделци царини до 400% за млечни производи.
„Канада, земја со која е многу тешко да се тргува, сега воведува скандалозен дигитален данок. Поради тоа, веднаш ги прекинуваме сите трговски разговори со нив,“ напиша Трамп, најавувајќи и нов сет на царини што ќе бидат соопштени во наредните седум дена.
Одлуката доаѓа во чувствителен момент, кога Трамп ја притиска својата агенда за нови трговски договори пред рокот што самиот го постави – 9 јули. Иако порача дека рокот е флексибилен, претседателот не ја исклучи можноста за брзо воведување на 25% царини за земји кои немаат договор со САД.
Притисок и кон ЕУ и Кина
Тензиите на трговски план не се ограничени само на Канада. Претходно, Трамп најави и царини од 50% за Европската унија, иако рокот за нивната примена беше продолжен до 9 јули. Во меѓувреме, течат интензивни разговори и со Кина, особено околу испораките на ретки земни елементи.
Американскиот министер за финансии, Скот Бесент, изјави дека трговските договори со повеќе од 18 партнери, вклучително и нови ревизии на договорот со Кина, би можеле да бидат финализирани до 1 септември.
Ситуацијата укажува на нова етапа на трговска изолација и потенцијална ескалација во економските односи со неколку од најблиските сојузници на Вашингтон.
