Трамп: Ќе има бомбардирање ако нема договор со Иран за нуклеарната програма

Американскиот претседател Доналд Трамп му се закани на Иран со бомбардирање и споредни царини доколку Техеран не постигне договор со Вашингтон за неговата нуклеарна програма.

Во телефонско интервју за Ен-Би-Си Њуз, Трамп рече дека американските и иранските претставници разговараат, но не даде детали.

„Ако не постигнат договор, ќе има бомбардирање“, рече Трамп. „Но, постои шанса, ако не склучат договор, јас ќе направам секундарни тарифи за нив како што направив пред четири години“.

Во неговиот прв мандат 2017-2021 година, Трамп ги повлече Соединетите држави од договорот од 2015 година меѓу Иран и светските сили со кој беа поставени строги ограничувања на спорните нуклеарни активности на Техеран во замена за олеснување на санкциите.

Трамп, исто така, повторно воведе опсежни санкции на САД. Оттогаш, Исламската Република далеку ги надмина договорените граници во нејзината ескалирана програма за збогатување ураниум.
Техеран досега го отфрли предупредувањето на Трамп да направи договор или да се соочи со воени последици.

Иран испрати одговор преку Оман на писмото на Трамп во кое тој го повика Техеран да постигне нов нуклеарен договор, изјави иранскиот министер за надворешни работи Абас Аракчи во четвртокот, цитиран од официјалната новинска агенција ИРНА.

Западните сили го обвинуваат Иран дека има тајна агенда за развој на способност за нуклеарно оружје со збогатување ураниум до високо ниво на фисилна чистота, над она што тие велат дека е оправдано за цивилна програма за атомска енергија.

Техеран вели дека неговата нуклеарна програма е целосно за цивилни енергетски цели.