Трамп не отстапува од агресивниот тон за Гренланд, „Не се откажувам од воена сила“

Американскиот претседател Доналд Трамп одржува агресивен тон во однос на Гренланд, велејќи за NBC News „никогаш не се откажувам од воената сила“ во однос на стекнувањето на данската територија.

Трамп во интервју за NBC News изјави дека „никогаш не би ја симнал воената сила од масата“ за да ја постигне својата цел, но вели дека верува дека постои „добра можност“ тоа да се направи без прибегнување кон сила, пренесува Тајмс оф Израел.

„Ова е светски мир, ова е меѓународна безбедност“, вели тој, но додава: „Јас не симнувам ништо од масата“.

„Ќе го добиеме Гренланд. Да, 100%“, рече Трамп.

Запрашан каква порака би испратила купувањето на Гренланд до Русија и остатокот од светот, Трамп вели: „Навистина не размислувам за тоа. Не ми е баш гајле“.

Коментарите уследија откако данскиот министер за надворешни работи ја искара администрацијата на Трамп за нејзиниот „тон“ во критикувањето на Данска и Гренланд, велејќи дека неговата земја веќе инвестира повеќе во безбедноста на Арктикот и останува отворена за поголема соработка со САД.

Министерот за надворешни работи Ларс Локе Расмусен ги даде забелешките во видео објавено на социјалните мрежи по напнатата посета на американскиот потпретседател Џеј Ди Венс на стратешкиот остров.

„Изнесени се многу обвинувања. И, се разбира, ние сме отворени за критики“, вели Расмусен зборувајќи на англиски. „Но, дозволете ми да бидам целосно искрен: не го цениме тонот со кој се испорачува. Вака не се зборува со вашите блиски сојузници. И јас сè уште ги сметам Данска и Соединетите држави за блиски сојузници“.

За време на неговата посета минатата недела, Венс рече: „Нашата порака до Данска е многу едноставна – вие не завршивте добра работа од народот на Гренланд“.

Гренланд е територија на Данска, која е сојузник на САД во НАТО. Трамп сака да ја анектира територијата, тврдејќи дека е потребна за цели на националната безбедност.