Skip to content
Претседателот рече дека новите бродови на морнарицата од „класа Трамп“ ќе бидат најголемите во историјата на САД. Трамп сака да ja поттикне американската бродоградба додека Кина ја проширува својата поморска флота.
Додека зборуваше во својата резиденција Мар-а-Лаго во Флорида, претседателот тврдеше дека бродовите на морнарицата од „класа Трамп“ „ќе бидат најголеми борбени пловила во историјата на нашата земја“.
Новата иницијатива ќе започне со два брода од „класа Трамп“ пред да се прошири на до 25 нови водни пловила, што ќе биде наречено „Златна флота“. Првиот брод од „класа Трамп“ ќе се вика „USS Defiant“.
„Американската морнарица ќе го води дизајнот на овие бродови заедно со мене, бидејќи сум многу естетска личност“, рече Трамп на настанот, на кој присуствуваа американскиот секретар за одбрана Пит Хегсет, секретарот за морнарица Џон Фелан и американскиот државен секретар Марко Рубио.
Трамп сака да ја поттикне бродоградбата на САД додека Кина ја проширува флотата
Претседателот вети дека ќе „ја обнови Америка како голема бродоградбена сила“. САД се загрижени поради постојано растечката поморска флота на Кина.
Трамп рече дека бродовите би можеле да бидат опремени со атомско оружје и би тежеле помеѓу 30.000 и 40.000 тони.
Бродовите се најновиот обид на американскиот претседател да остави свој белег врз вооружените сили на САД. Трамп никогаш не служел во војската.
Поморските бродови често се именувани по истакнати политички личности, како што е носачот на авиони „УСС Теодор Рузвелт“. Во моментов нема воени бродови именувани по Трамп.
Трамп претходно се пожали на „рѓосани“ бродови на американската морнарица. За време на неговото сослушување за потврда во февруари, секретарот на морнарицата Фелан рече дека Трамп го прашал „бројни пати“ што ќе прави во врска со кородираните американски бродови.
Плановите за проширување на морнарицата со нови борбени бродови доаѓаат и во време кога американската војска се вклучува во поморска блокада на Венецуела.
Претседателот минатата недела ја повика морнарицата да ги заплени санкционираните танкери за нафта што влегуваат и излегуваат од Венецуела, бидејќи администрацијата на Трамп врши притисок врз венецуелскиот лидер Николас Мадуро. САД досега заплениле два танкери за нафта и наводно гонат трет.
„Ако сака да направи нешто, ако се однесува строго, тоа ќе биде последен пат кога ќе може да се однесува строго“, рече Трамп на настанот во Мар-а-Лаго, осврнувајќи се на Мадуро.
Трамп ја окарактеризира Венецуела на Мадуро како центар за трговија со наркотици. Трамп рече дека би било „паметно“ Мадуро да се повлече.
Мадуро во понеделник му возврати на Трамп, велејќи му дека би било „подобро“ да се фокусира на домашните прашања на САД, наместо да ја таргетира Венецуела.
„Претседателот Трамп би бил подобар во својата земја и во светот“, рече Мадуро на јавната венецуелска телевизија. „Тој би бил подобар во својата земја во однос на економските и социјалните прашања, а би бил подобар и во светот ако се грижи за работите на својата земја“.