Skip to content
Американскиот претседател Доналд Трамп слета во Ријад, Саудиска Арабија, започнувајќи ја својата прва голема меѓународна посета за време на неговиот втор мандат како претседател, објави Си-Ен-Ен.
На терминалот беше поставен виолетов тепих за официјален пречек.
Трамп беше пречекан од саудискиот престолонаследник Мохамед бин Салман, а лидерите имаа церемонија на кафе на аеродромот пред Трамп да се упати кон својот хотел.
Церемонијалните аспекти на официјалната државна посета веќе беа видливи: улиците на Ријад на рутата од аеродромот до центарот на градот беа украсени со американски и саудиски знамиња.
Саудиски борбени авиони Ф-15 го придружуваа „Ер Форс Уан“ при неговото пристигнување, според објавата на социјалните мрежи на заменик-началникот на кабинетот на Белата куќа, Ден Скавин, и извештаите од новинарите што патуваат со претседателот.
Подоцна денеска, Трамп ќе присуствува на поформална церемонија за добредојде со престолонаследникот, претставување на делегациите, ручек со раководителите на компаниите, билатерални средби и потпишување договори во Кралската палата.
Се очекува Трамп да одржи говор и на американско-саудискиот инвестициски форум, а потоа да ги посети Дирија и Ат-Тураиф, места на УНЕСКО, пред да вечера со престолонаследникот.
Маската пристигна одделно
Милијардерот Илон Маск е исто така во Саудиска Арабија, изјави функционер на Белата куќа за Си-Ен-Ен.
Маск пристигна во Саудиска Арабија одделно од претседателскиот авион „Ер Форс Уан“, според официјалниот претставник.
Како што изјави за Си-Ен-Ен висок саудиски функционер, Маск ќе учествува на американско-саудискиот инвестициски форум во својство на извршен директор на компанијата Х.
Според официјалната веб-страница на настанот, форумот има за цел да „ги собере големите саудиски и американски инвеститори“. Меѓу говорниците се Лари Финк од американскиот инвестициски гигант BlackRock, како и извршниот директор на Nvidia, Јенсен Хуанг.
Продажба на оружје во ОАЕ
Неколку дена по турнејата на Трамп на Блискиот Исток, САД објавија продажба на оружје во вредност од над 1,4 милијарди долари на Обединетите Арапски Емирати.
Продажбата, одобрена од Стејт департментот и доставена до Конгресот, вклучува 1,3 милијарди долари за хеликоптери „Чинук“ и 130 милиони долари за делови и логистичка поддршка за борбени авиони „Ф-16“.
ОАЕ ќе бидат последната станица од посетата на Трамп на Блискиот Исток, а земјата вети дека ќе инвестира 1,4 трилиони долари во САД во текот на следните десет години.
Се очекува посетата на ОАЕ да резултира со објавување на голем број финансиски договори меѓу двете земји, фокусирани на области како што се вештачката интелигенција, полупроводниците, производството и енергетиката.
Трамп би можел да објави и голема продажба на оружје на Саудиска Арабија, што е првата станица на неговата регионална турнеја.
Оваа година, демократските пратеници – моментално во малцинство во двата дома на Конгресот – се спротивставија на продажбата на оружје на ОАЕ.
Во јануари, сенаторот Крис Ван Холен и претставничката Сара Џејкобс ги критикуваа ОАЕ за наводно испраќање оружје до паравоените сили на Силите за брза поддршка во Судан.
Можност за кралството
За Саудиска Арабија, посетата на американскиот претседател Доналд Трамп е можност кралството да покаже што нуди во време кога Блискиот Исток брзо се менува, според регионален експерт за CNN.
„Тоа ќе биде клучен момент и вистинска можност за Саудиска Арабија да го покаже својот потенцијал“, изјави Дина Есфандијари, директорка за Блискиот Исток во „Блумберг економикс“.
Раководството во Ријад, додава таа, ќе се обиде да покаже дека е стабилна земја, дека води политика „без проблеми со соседите“, дека е отворена за инвестиции и дека има многу големи и амбициозни идеи.
„Посетата на Трамп ќе биде и шанса за Ријад да „постави црвени линии2 за тоа што сака од САД во регионот и во однос на конфликтите на Блискиот Исток“, вели Есфандијари и истакнува дека денешниот Блиски Исток е многу различен од оној што Трамп го посети за време на неговиот прв мандат.
Саудиска Арабија неодамна преговараше со својот поранешен противник Иран и внимава да не биде вовлечена во каков било воен конфликт меѓу Техеран, САД и Израел.
