Skip to content
Тројца ирански државјани се обвинети во Велика Британија под сомнение за шпионажа во корист на иранската разузнавачка служба, соопшти денес лондонската полиција. Обвиненијата произлегуваат од „многу сложена и брза истрага“, спроведена од антитерористичката единица на Скотланд Јард.
Според соопштението, осомничените дејствувале во периодот од 14 август 2024 до 16 февруари 2025 година. Полицијата наведува дека се обвинети за активности кои можеле да ѝ помогнат на странска разузнавачка служба, во овој случај Иран.
„Станува збор за многу сериозни обвиненија“, изјави командантот на антитерористичката единица, Доминик Мерфи. Според него, еден од обвинетите бил вклучен во надзор, извидување и пребарувања со отворен код, со цел извршување сериозно насилство врз одредено лице во Обединетото Кралство. Другите двајца, како што се наведува, обезбедувале логистичка поддршка и информации за спроведување насилни активности од страна на трето лице.
Обвинетите беа уапсени на 3 мај, а денес се очекува да се појават пред судот во Лондон. Дополнително, четврта личност беше приведена на 9 мај, но беше ослободена без обвинение на 15 мај.
Апсењата се спроведени во согласност со Законот за национална безбедност, кој ѝ овозможува на полицијата да приведува лица без налог во случаи каде што постои основано сомнение за поврзаност со активност што претставува закана од странска сила.
Случајот предизвикува значителен интерес во јавноста, а властите истакнаа дека ќе продолжат со внимателно следење на можни безбедносни закани од странски држави.
