Skip to content
Белгиските власти уапсија осум лица во координирана акција на полицијата во Брисел и Левен, по четиримесечна истрага за наводен план за ликвидација на главниот обвинител на Брисел, Жилиен Моинил.
Претресите биле извршени во 18 домови, а според Државното обвинителство, осомничените имаат криминално досие поврзано со организиран шверц на дрога и можно е да делуваат во рамките на албанската криминална мрежа.
„Во оваа фаза не може ниту да се потврди ниту да се исклучи дека навистина постоел план да се нападне јавниот обвинител“, изјави федералната обвинителка Ан Франсен.
Сите уапсени лица се сослушуваат, а истражен судија ќе одлучи дали ќе останат во притвор.
Моинил под полициска заштита поради претходни закани
Жилиен Моинил ја презеде функцијата во јануари, а веќе во јули бил ставен под полициска заштита поради сериозни закани од нарко-групи кои оперираат во Брисел. Белгиската престолнина во последните години се соочува со ескалација на насилство и пукања поврзани со трговија со дрога.
Според полициски податоци, до крајот на октомври годинава биле регистрирани 78 вооружени инциденти. Лани имало 92 пукања, во кои загинале девет лица, а 48 биле повредени.
Франсен предупреди дека полицајците и обвинителите имаат потреба од многу посилна заштита бидејќи „секојдневно се на линијата на оган во борбата против организираниот криминал“.
Критики за недостиг од ресурси
Моинил претходно предупреди дека ситуацијата станува неконтролирана и дека без координирана акција против нарко-бандите, „секој граѓанин на Брисел може да биде погоден од залутан куршум“.
Иако обвинителството доби дополнителни обвинители, федералната судска полиција во Брисел и натаму се соочува со хроничен недостаток на кадар.
Во септември, министерот за одбрана Тео Франкен најави дека ќе испрати војници на улиците на Брисел за поддршка во акциите против дрога и криминал – мерка која предизвика бројни дебати во Белгија.
Истражителите сè уште ја утврдуваат точната намера на групата уапсени лица, а истрагата продолжува во насока дали навистина се работело за подготвен атентат врз еден од највисоките правосудни функционери во белгискиот главен град.
Извор: Euronews
