Skip to content
Шок и неверување ја потресоа престижниот Масачусетски технолошки институт (МИТ) и мирното бостонско предградие Бруклин по веста за бруталното убиство на ценет универзитетски професор.
Нуну Ф. Г. Луреиро (47), професор по нуклеарна наука, инженерство и физика и директор на Центарот за наука за плазма и фузија при МИТ, бил застрелан со повеќе куршуми во понеделникот навечер пред својот дом на улицата Гибс. Од здобиените повреди починал во болница рано во вторникот наутро, потврди канцеларијата на окружниот обвинител на округот Норфолк, Мајкл В. Мориси, пренесуваат американските медиуми.
Полицијата интензивно трага по сторителот, но засега објавува малку детали за истрагата. Сосетка која живее во станот над домот на Луреиро изјавила дека слушнала повеќе истрели. Кога излегла од станот, го затекнала професорот како лежи на грб на самиот влез од зградата. Таа, уште еден сосед и сопругата на Луреиро веднаш повикале итна помош.
На местото на настанот полицијата пронашла чаури во предворјето, а куршумите биле забодени во ѕидовите. Описите на возилото со кое наводно избегал напаѓачот се различни, според еден полициски извор станувало збор за сив седан со изгаснати светла, додека друг спомнал син или црн автомобил.
Началничката на полицијата во Бруклин, Џенифер Пастер, изјави дека истрагата е активна и во тек. Таа нагласи дека, за да се заштити интегритетот на истрагата, во овој момент не можат да се споделат повеќе информации и побара разбирање и трпение од јавноста. Иако ФБИ понудило помош, таа засега не е побарана. Надлежните наведуваат дека убиството не е поврзано со пукањето што се случи во саботата на Универзитетот Браун, каде што беа убиени двајца студенти.
Во вторникот навечер, жителите и колегите одржаа бдеење во знак на почит кон убиениот професор. Според соседите, Луреиро бил татко на три деца, а неговата смрт ја потресе целата заедница.
Колегите и соработниците го опишуваат како исклучително интелигентна, љубезна и духовита личност. Претседателката на МИТ, Сали Корнблут, изрази длабоко сочувство до семејството, нагласувајќи дека универзитетот ќе им пружи поддршка на сите погодени од трагедијата.
Луреиро пораснал во малиот португалски град Визеу, дипломирал физика во Лисабон, докторирал на Империјал колеџ во Лондон, а истражувачката кариера ја продолжил на Принстон и во британска национална лабораторија за фузија. Во 2016 година се приклучил на МИТ, а во 2024 година бил именуван за директор на Центарот за наука за плазма и фузија, кој обединува повеќе од 250 истражувачи и студенти.
Неговата блескава научна кариера беше трагично прекината, а колегите истакнуваат дека неговото отсуство длабоко ќе се почувствува, не само на МИТ, туку и во пошироката научна заедница.