Skip to content
Нова серија украински крстосувачки ракети „Фламинго“ погоди база на руската безбедносна и разузнавачка служба ФСБ на окупираниот Крим. Според првичните информации, во нападот загинал еден агент на Кремљ, а уништени или оштетени се шест летала што биле стационирани во објектот, објави Kyiv Post.
Најмалку три ракети, најверојатно лансирани од областа на Одеса, го прелетале западниот дел на Црното Море и погодиле објект во близина на градот Армјанск, јави украинскиот воен портал Militarniy.
Со базата, според украинските медиуми, управува ФСБ уште од руската анексија на Крим во 2014 година. Ракетите ја срушиле административната зграда и уништиле шест воени летала од типот A-8 Khivus и A25PS, кои служеле за поморски патроли и превоз на вооружени единици. Жителите на Армјанск сведочеле за силни експлозии и пристигнување на итна помош на местото.
Во неделата украинските медиуми објавија видео од воен блогер на кое се гледа лансирање на три ракети „Фламинго“ пред зори. Европската мрежа Copernicus преку сателитски снимки потврди можно уништување и пожар во рамките на базата. Руската независна агенција Астра го потврди нападот, но наведе дека можно е користена модифицирана ракета „Long Neptune“.
Истовремено, во саботата изутрина бил изведен напад со дронови врз воен аеродром во близина на Симферопол. Украинската воена разузнавачка агенција (ХУР) соопшти дека се оштетени или уништени најмалку два воени хеликоптери. Астра јави дека целосно уништен е еден Ми-8, а борбен хеликоптер Ми-24 е речиси сигурно уништен.
Ракетата „Фламинго“ е претставена средината на август како домашен украински проект способен да носи боева глава потешка од една тона и да погоди цели на повеќе од 3.000 километри. Таа е развиена за помалку од една година, со цел да се заобиколат ограничувањата на НАТО-оружјето кое не смее да се користи за напади на руска територија.
Претседателот Володимир Зеленски најави дека Украина ќе ги засили нападите врз цели во Русија, обвинувајќи го Кремљ дека не е заинтересиран за мир. Москва, пак, тврди дека се залага за преговори и ја обвинува Украина за агресија, како и НАТО за индиректна помош преку разузнавачки летови над Црното Море. Алијансата возвраќа дека и понатаму обезбедува материјална поддршка на Киев, но без директно учество во борбени операции против Русија.
