Киев ја обвини Москва дека се обидува да го уништи украинскиот идентитет со населување Руси на окупираните територии во Украина.
Украинската заменик-министерка за одбрана Хана Малиар вчера изјави дека Москва иницирала големо преселување на луѓе од посиромашните и пооддалечените региони на Русија во Украина, главно во окупираниот источен регион Луганск. Таа рече и дека Русија ги депортира украинските граѓани и насилно ги преселува во Русија.
Таа на Телеграм напиша дека руските имигранти во окупираните делови на Украина добивале финансиска помош, дом и вработување, додека локалните жители биле депортирани. „Со тоа непријателот се обидува да ја уништи украинската државност и националниот идентитет на привремено окупираните украински територии“, рече таа и додаде: „Земјата агресор се обидува да влијае на промената на етничкиот состав на населението во областите окупирани од Русија“.
И Институтот за проучување на војната (ИСВ) денеска соопшти дека Москва најверојатно се обидува да ја продлабочи социјалната, политичката и економската интеграција на Русија на окупираната земја „со цел да ги искомплицира условите за реинтеграција на овие територии во Украина“.
ИСВ претходно ја опиша таквата кампања за депопулација и повторно населување како дел од „намерно етничко чистење“ што е кршење на Женевската конвенција за спречување и казнување на злосторството геноцид.
Извор (МИА0
