Skip to content
Украинските сили за специјални операции (ССО) соопштија дека уништиле руски повеќецевен ракетен фрлач BM-27 „Ураган“ и извеле низа напади врз руски воени позиции во Донецката област. Според објавата, операцијата била изведена рано утрово со помош на беспилотни летала FP-2 од домашно производство, објави „Kyiv Post“.
Во соопштението објавено на Телеграм се наведува дека нападот се случил во населбата Благодатне, каде што бил погоден магацин со ракетен систем BM-27 „Ураган“, како и позицијата на неговиот екипаж. Станува збор за ракетен систем со калибар од 220 милиметри, способен да испукува високоексплозивни и касетни проектили на далечина до 35 километри.
Украинската страна објави и видеоснимки од дронови кои ги прикажуваат моментите на ударите, но, како што наведува „Kyiv Post“, времето и точната локација на видеата не можеле независно да бидат потврдени.
ССО информираа и за напади врз концентрација на руски сили во областа на Покровск. Според нивните наводи, руските трупи се обиделе да се утврдат долж железничката пруга со цел понатамошно напредување, но биле нападнати од украински дронови со експлозив додека се приближувале. Во нападот, дел од руските војници биле убиени.
По ударите со дронови, припадници на 3. полк на ССО елиминирале уште двајца руски војници кои се криеле во ровови. „И покрај силниот руски артилериски оган, нашата група успешно ја изврши задачата и го спречи непријателот да ги обезбеди планираните позиции“, се наведува во соопштението.
Овие операции следуваат по нападите извршени во неделата, на 14 декември, кога, меѓу другото, беше погоден воз што превезувал гориво на окупираниот Крим. Пријавени беа и удари врз руска станица за електронско војување „Волна-2“ во близина на Марјанивка, како и врз центар за обука на оператори на FPV-дронови кај Докучајевск.
Битката за Покровск
Врховниот командант на украинските вооружени сили, Олександр Сирски, изјави дека Покровск и Мирнохрад, двата клучни града во Донецката област, и понатаму остануваат силни украински одбранбени упоришта. Тој нагласи дека руските обиди за освојување на областа пропаднале и покрај повеќемесечниот притисок.
„Одбраната на Покровск трае веќе 16 месеци. Русија најмалку шест пати објави датуми за преземање контрола врз целиот Донбас, но тоа не се случи“, изјави Сирски, додавајќи дека Мирнохрад не е опколен и дека логистиката, иако отежната, сè уште функционира.
Според Сирски, Русија во областа на Покровск концентрирала околу 156.000 војници, а регионот го опиша како главно бојно поле каде што се користи приближно половина од сите руски наведувани воздушни бомби долж целата фронтова линија.
Тој потврди и неодамнешно повлекување на украинските сили од позиции оддалечени пет до седум километри од Покровск, појаснувајќи дека таму не било можно спроведување ротација на силите, а руските трупи успеале да извршат пробив.
Украински воени извори наведуваат дека Русија ги засилила нападите врз урбаната зона Покровск–Мирнохрад со ангажирање оперативни резерви. Според информациите на украинските воздушно-десантни сили, руските трупи се утврдиле во јужните делови на Покровск, додека северните делови на градот и понатаму се под украинска контрола.