Skip to content
Земјоделци од цела Европа денеска со трактори ги блокираа улиците на Брисел, протестирајќи против трговскиот договор меѓу Европската Унија и неколку јужноамерикански земји. Демонстрантите предупредуваат дека договорот ризикува да создаде нелојална конкуренција и сериозно да ја загрози европската земјоделска продукција.
Европската земјоделска федерација Copa-Cogeca соопшти дека на протестите учествувале околу 10.000 луѓе. Според земјоделците, договорот ЕУ–Меркосур, кој ги опфаќа Аргентина, Бразил, Парагвај и Уругвај, би можел да создаде неодржливи пазарни услови и значително да им наштети на нивните бизниси.
Поделени ставови во ЕУ
Прашањето предизвика поделби и меѓу европските лидери. Францускиот претседател Емануел Макрон изјави дека ЕУ не смее да ги загрози своите земјоделци и производители на храна со потпишување договор кој сè уште не е финализиран. Франција и Италија повикаа на одложување на потпишувањето додека не се обезбедат соодветни заштитни услови за земјоделците.
Од друга страна, Германија и Шпанија остануваат меѓу најгласните поддржувачи на договорот, тврдејќи дека тој би го зголемил европскиот извоз во услови на слаб економски раст и засилена глобална конкуренција. Поддржувачите го гледаат Меркосур и како начин за диверзификација на трговските партнерства, особено во контекст на зголемените царински притисоци од САД.
Тензии на улиците на Брисел
Првите групи демонстранти пристигнале уште синоќа, а денеска тензиите ескалираа на плоштадот Луксембург, во близина на Европскиот парламент. Дел од протестирачите фрлаа стаклени шишиња и компири и запалија дрва од приколките, додека беше употребена и пиротехника. Полицијата одговори со солзавец и водени топови.
Иако земјоделците имаа намера да стигнат до зградата на Европскиот совет, каде што се одржува самит на лидерите на ЕУ, полицијата постави барикади и не дозволи нивен премин. Тракторите беа паркирани долж патиштата кон Советот, а во градот досега пристигнале околу 150 трактори, со најава за нови колони. Поради протестите, привремено беа затворени неколку главни сообраќајници, а јавниот превоз функционираше со прекини.