Skip to content
Лидерите на Велика Британија, Франција и Германија денес го повикаа Иран да се воздржи од какви било чекори што би можеле дополнително да го дестабилизираат Блискиот Исток, откако САД извршија воздушни напади врз ирански нуклеарни објекти.
Во заедничка изјава, неформалната група Е3 – составена од овие три европски земји – порача дека Иран не смее да поседува нуклеарно оружје, нагласувајќи дека таквиот развој би бил сериозна закана за регионалната безбедност.
„Секогаш сме биле јасни: Иран не смее да има нуклеарно оружје. Неопходно е да се зачува стабилноста во регионот и да се спречат дополнителни ескалации“, се вели во изјавата на Е3.
Повик за преговори и потврда на поддршката за Израел
Лидерите на трите европски сили ја потврдија својата „цврста поддршка“ за безбедноста на Израел, нагласувајќи ја важноста на дипломатскиот ангажман.
„Го повикуваме Иран да се врати на преговарачката маса за постигнување сеопфатен договор што ќе ги адресира сите грижи поврзани со неговата нуклеарна програма. Подготвени сме да работиме со сите страни на ова прашање“, се додава во соопштението.
Вашингтон: Напади врз нуклеарни локации
Американскиот претседател Доналд Трамп изјави дека американските сили нападнале три главни ирански нуклеарни објекти, предупредувајќи дека следниот удар ќе биде „уште поразорен“ доколку Иран не се согласи на дипломатско решение.
„Ќе продолжиме со нашите дипломатски напори за намалување на тензиите и спречување на проширување на конфликтот“, се наведува во изјавата на Е3.
