Велика Британија: Не исклучуваме испраќање војници во Украина, влеговме во оперативна фаза

Запрашан од новинарите за ставовите околу испраќање копнени сили во Украина, портпаролот на кабинетот на британскиот премиер Кир Стармер рече: „Не, ништо не е исклучено во ниту еден поглед, така што јас не би исклучил никакви опции“.

„Јасно е дека ќе бидат потребни илјадници војници за да го поддржат распоредувањето на силите, без разлика дали се на море, на копно или во воздух“, рече портпаролот. „Секое распоредување сили ќе бара значителна логистичка поддршка и јасна дефиниција на основната логистика како што е транспортот на луѓе и обезбедувањето ротација на силите, така што, како што веќе кажа премиерот, мора да бидеме подготвени за сите можности“, рече функционерот.

„Сега влеговме во оперативна фаза, а тоа значи здружување на воените планери за да ја разгледаат структурата на потенцијалните сили, нивната интероперабилност и капацитетите потребни за Украина да може долгорочно да го брани независно својот суверенитет“, додаде тој.

„Следната недела дополнително ќе го забрзаме темпото и ќе го зголемиме опсегот на оперативното планирање со понатамошни состаноци во нашиот штаб во Нортвуд, каде што подетално ќе ја анализираме структурата на сите идни сили“, додаде тој.