Израелските тенкови се на чекор од Дамаск во Сирија

Упадот на израелската армија во Сирија напредува и е на околу 25 километри југозападно од главниот град Дамаск, изјавија денеска за Ројтерс два регионални безбедносни извори и еден сириски безбедносен извор.

На патот, таа зазеде неколку градови и села. Како што беше најавено, во светло на офанзивата, израелски беспилотни летала континуирано го напаѓаат сирискиот главен град.

Во исто време, Ројтерс и „Ал Арабија“ наведуваат дека израелските воздухопловни и ракетни сили извршиле напади врз најголемите воздушни бази во Сирија, уништувајќи ја инфраструктурата, авионите и хеликоптерите на сириските воздухопловни сили.

Се посочува дека мета бил хелиодромот во предградието на Дамаск, како и баталјонот за воздушна одбрана на сириската армија во областа Малула. Се наведува дека во нападот биле уништени десетици хеликоптери и ловци.

Сириски безбедносен извор изјави дека израелските војници стигнале до Катана, лоцирана на 10 километри во сириска територија источно од демилитаризираната зона што ја дели Голанската висорамнина окупирана од Израел од Сирија.

Израелската армија не ги коментираше овие наводи, пренесува агенцијата.

Израелски авиони вчера бомбардираа најмалку три водечки воени воздушни бази на сириската армија, каде што се наоѓаа десетици хеликоптери и авиони, соопштија два сириски извори, додека министерот за надворешни работи Гидеон Сар изјави дека биле бомбардирани и „остатоци од хемиско оружје“.

Неименуван висок израелски функционер изјави дека воздушните напади ќе продолжат и во наредните денови, додека Саар рече дека Израел нема намера да се меша во внатрешните работи на Сирија и дека е заинтересиран само да ги брани сопствените граѓани, пренесе Ројтерс.