Skip to content
Жан-Мари Ле Пен, долгогодишен симбол на француската екстремна десница, беше испратен на вечен починок, вчера во неговиот роден град Ла Трините-сур-Мер, западна Франција. На церемонијата, одржана во тесен круг од семејството и пријателите, присуствуваа околу 200 лица.
Меѓу присутните беше и неговата ќерка Марин Ле Пен, која по церемонијата во црквата заедно со семејството и блиските го придружуваше ковчегот до семејната гробница, лоцирана неколку стотини метри подалеку. Ле Пен, кој почина во 96-та година од животот, беше погребан покрај своите родители.
Како коосновач на Националниот фронт, Ле Пен ја предводеше партијата од нејзиното создавање во 1972 година до 2011 година, кога се повлече од политиката. Подоцна лидерството го презеде неговата ќерка Марин, која ја водеше партијата до 2022 година.
Церемонијата се одвиваше под силно полициско обезбедување, а властите забранија протести во градот поради собирања во неколку француски градови на денот на неговата смрт, кога дел од јавноста ја одбележа веста со славење.
