Војската на Буркина Фасо обвинета за масакр врз повеќе од 100 цивили

Најмалку 130 цивили биле убиени во март од страна на владините сили на Буркина Фасо и сојузничките милиции во близина на западниот град Соленцо, се наведува во нов извештај на Хјуман рајтс воч (HRW).

Според извештајот, овој „масакр“ е резултат на операција предводена од специјалните сили на земјата и довел до широко распространети цивилни жртви, како и масовно раселување на етничката заедница Фулани.

Фуланите, претежно муслиманска сточарска заедница, често се обвинувани од страна на властите за поддршка на исламистички милитанти – обвинување што нивните водачи постојано го отфрлаат.

Околу 40% од територијата на Буркина Фасо е под контрола на групи поврзани со Ал Каеда и Исламска држава, кои оперираат низ регионот на Сахел во Западна Африка. Нападите од овие групи – со илјадници жртви и милиони раселени лица – продолжуваат и покрај ветувањата на воените власти дека ќе го сузбијат бунтот.

Минатата година, владата веќе го отфрли еден извештај на HRW како „неоснован“, откако беа изнесени слични обвинувања дека војската е одговорна за убиството на 223 селани. Тогаш властите тврдеа дека сите обвинувања за кршење на човековите права се темелно истражени во рамките на борбата против тероризмот.

HRW наведува дека за новиот извештај интервјуирала сведоци, членови на милицијата, новинари и претставници на граѓанското општество, а исто така анализирала видеа споделени на социјалните мрежи.

Организацијата тврди дека понатамошните истраги ја потврдиле одговорноста на армијата за убиствата во март: „Војската на Буркина Фасо е одговорна за овие масовни убиства на цивили од етничката заедница Фулани“, се наведува во извештајот.

Исто така, се додава дека најмалку 100 цивили биле убиени во одмазднички напади од страна на џихадистички групи, насочени кон лица осомничени за соработка со војската.

„Масовните убиства на цивили од страна на владините сили, милициите и исламистичките групи претставуваат воени злосторства и други тешки повреди на меѓународното хуманитарно право“, заклучува HRW, повикувајќи на итна истрага и казнување на одговорните.