Волстрит пишува историја, најбрзо закрепнување на берзата во последниве 40 години

Американските берзи забележаа силен раст во вторникот, предводени од технолошките акции, откако беа објавени податоци за пад на потрошувачката инфлација во април и потврда за трговско примирје меѓу САД и Кина.

Индексот S&P 500 порасна за 0,7%, со што влезе во позитивна зона за целата 2025 година. Почетниот пад од 15% во првите месеци од годината е целосно надминат, и тоа со најбрз опоравок на индексот во последните 40 години.

Индексот Nasdaq Composite скокна за 1,8%, продолжувајќи го растот од претходната сесија, со што официјално влезе во нов „биков пазар“. Акциите на Nvidia скокнаа за речиси 6%, со што пазарната капитализација повторно надмина 3 трилиони долари, благодарение на позитивните трговски вести. Tesla и Meta исто така забележаа добивки од 5% и 3% соодветно.

Пад на Dow Jones поради UnitedHealth

Од друга страна, Dow Jones индексот опадна за 0,6%, главно поради драматичен пад од 18% на акциите на UnitedHealth. Причината за тоа беше изненадната оставка на извршниот директор Ендру Вити и одлуката на компанијата да ги суспендира финансиските прогнози за 2025 година.

Намалувањето на инфлацијата внесува нова надеж кај инвеститорите дека Федералните резерви би можеле да ја намалат основната каматна стапка во септември. Приносот на десетгодишните обврзници се искачи на 4,5%, што е највисоко ниво во последниот месец.

Иако новите трговски тарифи на Доналд Трамп сè уште не покажуваат целосно влијание, големите производители веќе реагираат. Honda најави дека очекува пад на профитот од три милијарди долари поради новите царини на автомобили.