Skip to content
Во неделата во Романија се одржаа претседателски избори, а според првичните, неофицијални податоци, убедливо водство во првиот круг има кандидатот од радикалната десница Ѓорѓе Симион.
Се очекува во вториот круг да се соочи со второпласираниот кандидат, Крин Антонеску.
Симион, 38-годишен лидер на партијата „Алијанса за Унија на Романците“, ја започнал својата активистичка кариера уште за време на студиите, учествувајќи во протести со цел обединување на Романија и Молдавија. По неуспешен обид да стане независен европратеник во 2019 година, ја формира сопствената партија.
Политика инспирирана од Трамп
Симион е отворен обожавател на Доналд Трамп. Често носи капчиња со негов лик, а својата политичка ориентација ја опишува како „трампистичка“. Неговата партија сега е втора по број на пратеници во романскиот парламент. Нејзините ставови се блиски до идеите на Трамповиот MAGA-покрет — силен социјален конзервативизам и целосно противење на воена помош за Украина.
Во екот на пандемијата, неговото политичко влијание нагло се зголеми откако неговата партија жестоко се спротивстави на владините ограничувања, а на социјалните мрежи ширеше теории на заговор поврзани со вакцините.
Проблеми со Украина и Молдавија
Во 2024 година, Украина му забрани влез на три години, наведувајќи „системски антиукраински активности“. Симион тврди дека не е проруски ориентиран, туку само „проромунски“. Слични проблеми имал и со Молдавија, која повеќепати му забрани влез поради загрозување на националната безбедност.
Иако јавно истакнува дека Романија треба да остане дел од ЕУ, Симион често го критикува Брисел, велејќи дека ќе ги прекршува европските закони со кои не се согласува. Тој неодамна ја пофали италијанската премиерка Џорџа Мелони, нарекувајќи ја „херој“, и повика на „мелонизација на Европа“. „Верувајте ми, ќе има и симионизација“, изјави минатата година за „Политико“.
Откажани избори и симболична кампања
По поништените претседателски избори од минатата година, кога победи кандидатот Калин Ѓорѓеску — подоцна дисквалификуван поради наводно руско влијание — Симионовиот рејтинг драматично порасна. Тој жестоко го осуди укинувањето на тие избори и повторните избори ги претстави како битка за демократија и владеење на правото. Најави дека ако стане претседател, Ѓорѓеску ќе добие висока функција.
На една од последните дебати се појави со букет за кандидатката од левиот центар, Елена Ласкони, а потоа демонстративно ја напушти дебатата во знак на протест поради откажаните избори.
Од маргините до претседателската палата?
Симион важи за политичар кој го користи театралниот пристап како алатка за мобилизација. Политичката кариера ја започна како уличен активист со ултранационалистички пораки. Сега, резултатот од неделните избори го поставува на чекор до претседателската палата Котрочени во Букурешт – и потенцијално до највисоката функција во земјата.
