Skip to content
Нуклеарната централа Запорожје, една од најголемите во светот, која е под руска контрола речиси четири години, наскоро ќе го врати надворешното електрично напојување по повеќе од еден месец прекин, соопштија украинските власти.
Министерката за енергетика на Украина, Светлана Гринчук, рече дека е поправена главната преносна линија „Днипровска“ од 750 киловолти која ја поврзува централата со националната електрична мрежа. Во тек е и поправка на резервната линија „Феросплавна“ од 330 киловолти, која минува преку територии под руска контрола.
Меѓународната агенција за атомска енергија (МААЕ) објави дека поправките биле извршени благодарение на договорен локален прекин на огнот и ги оцени како „важен чекор за безбедноста на централата“.
Воедно, ова е ретка прилика за соработка меѓу украинските и руските сили, кои создадоа посебни зони за да се овозможи безбедна работа на техничките екипи.
Откако минатиот месец централата остана без надворешно струјно напојување, таа работи исклучиво на дизел генератори, кои служат како крајна мерка за ладење на реакторите. Ова долго користење на резервното напојување предизвика голема загриженост поради ризик од нуклеарна несреќа.
Украинскиот претседател Володимир Зеленски порано предупреди дека ситуацијата е сериозна и дека генераторите не се дизајнирани да работат толку долго.
Директорот на МААЕ, Рафаел Гроси, истакна дека додека конфликтот трае, безбедноста на нуклеарните објекти е сериозно загрозена, но ја поздрави успешната поправка како позитивен знак.
