Зошто сè повеќе млади Германци ја поддржуваат крајната десница?

Германската ултрадесничарска партија AfD бележи растечка поддршка кај младите, тренд што ги загрижува традиционалните партии. Анкетите покажуваат дека се повеќе млади Германци, особено мажи, ја поддржуваат AfD, привлечени од нејзината реторика против имиграцијата, евроскептицизмот и критиката кон владините политики.

Социјалните мрежи играат клучна улога во ширењето на нивните пораки, додека економската неизвесност и стравот од иднината ги поттикнуваат младите да бараат алтернатива во политиката на AfD, се вели во анализата на Би-Би-Си.

„Она што ме научија моите родители е дека некогаш живееле во мир и без страв во сопствената земја. Би сакал да живеам во земја во која не морам да се плашам, вели 19-годишниот Ник.

-Се среќаваме во мал бар во Фрајберг, некогашен рударски град во Саксонија, каде што тој игра пикадо со својот пријател Доминик, 30-годишен поддржувач на партијата Алтернатива за Германија (AfD). Оваа крајнодесничарска партија веќе подолго време е втора по рејтинг во анкетите, додека слични движења во Германија и Европа привлекуваат сè повеќе млади луѓе, особено мажи, се вели во анализата.

Еден од главните фактори за растечката поддршка е загриженоста за безбедноста, поврзана со криминални инциденти во кои се осомничени баратели на азил. Последниот ваков случај беше напад со нож во паркот во Ашфенбург, Баварија. Иако Ник и Доминик не се против сите имигранти, тие сметаат дека системот за азил се злоупотребува.

„Луѓе кои се интегрираат, учат, работат – со нив немам проблем“, вели Доминик. Но, додава дека секоја критика за имиграцијата веднаш се смета за непријателска.

Анкета на истражувачкиот центар Pew од 2024 година покажа дека 26% од мажите и 11% од жените во Германија имаат позитивно мислење за AfD, а бројот на мажи кои ја поддржуваат партијата пораснал за 10 процентни поени од 2022 година.

На изборите за Европскиот парламент 2024 година, 16% од младите под 24 години гласале за AfD, што е значително зголемување во однос на 2019 година. Истражувањата покажуваат дека анксиозноста е највисока кај младите кои се идентификуваат со крајната десница, додека оние во политичкиот центар се чувствуваат најстабилно.

Политичките пораки на AfD се шират и преку платформи како TikTok, каде што официјалниот профил на партијата има 539.000 следбеници – далеку повеќе од владејачката Социјалдемократска партија (SPD) со 158.000 следбеници. Многу содржини поврзани со AfD се промовираат и од поддржувачи кои имаат големо влијание врз помладите гласачи.

Селина Брихки, 25-годишна TikTok инфлуенсерка, активно ја промовира AfD преку видеа за танци, трендови и животен стил. Таа се залага за реставрација на воениот рок и построга контрола на границите, но тврди дека не е расистка.

Додека ужасите на нацистичката историја се сè подалеку во минатото, AfD станува сè поприсутна во германскиот политички пејзаж. Од 2017 година, таа има свои претставници во парламентот, а нејзината реторика сè повеќе се прифаќа како нормална.

И покрај тоа што партијата е формално класифицирана како екстремистичка во три германски покраини, вклучувајќи ја и Саксонија, нејзиното влијание меѓу младите продолжува да расте. Поради ова, клучното прашање останува: какви последици ќе има овој тренд врз иднината на Германија?