Skip to content
Армијата на Северна Македонија денес, 18 август, одбележува 33 години од формирањето со централна свеченост во касарната „Јане Сандански“, каде присуствуваше државно-воениот врв. Претседателката и врховен командант Гордана Сиљановска-Давкова порача дека Армијата три децении е чувар на татковината – ангажирана во одбраната, справувањето со кризи и поддршката на цивилните институции при пожари и поплави – и затоа ужива највисока доверба кај граѓаните.
Таа повика на долгорочни проекти што ќе гарантираат самоодржливост на одбраната, не само во мир, туку и во амбиент на можни безбедносни закани.
Министерот за одбрана Владо Мисајловски нагласи дека „роденденот“ на Армијата симболизира 33 години напредок, безбедност и сигурност, и дека буџетирањето за одбраната останува на високо ниво. Според него, во фокус се модернизацијата и опремувањето согласно обврските во НАТО: пред неколку дена пристигнаа 29 нови лесни оклопни возила од американско производство, следуваат нови артилериски системи, униформи, опрема за сајбер-одбрана, специјални возила, како и набавка на хеликоптери. Дополнителна поддршка доаѓа преку сојузниците – индивидуална опрема од Обединетото Кралство, нови комплети борбени униформи од Турција, како и средства од околу 38 милиони евра преку Европскиот мировен фонд за медицински возила, инженерски машини (дозери, натоварувачи), робот за уништување НУС, влечни возила и друга опрема. Во завршна фаза е и приемот на 300 нови професионални војници.
Со ова, како што порача раководството, Армијата продолжува да се подмладува, да се опремува и да ги исполнува стандардите на Алијансата – со цел да остане гарант на стабилноста и темел на државата и во иднина.
