62 милиони Американци веќе гласале на претседателските избори

Повеќе од 62 милиони Американци веќе гласале на претседателските избори во САД, покажуваат податоците на изборната лабораторија при Универзитетот на Флорида.

Остануваат уште пет дена до изборите, а според податоците 33 милиони Американци веќе лично го искористиле правото за предвремено гласање, додека околу 28 милиони гласале по пошта.

Во Невада, една од државите каде што се „кршат копјата“ на претседателските избори и каде што и Камала Харис и Доналд Трамп водат активни кампањи, повеќе од 872 илјади гласови веќе се дадени.

Според последните анкети, Потпретседателката на САД и демократска кандидатка на претседателските избори, Камала Харис, има мала предност пред републиканскиот противкандидат Доналд Трамп во Мичиген и Висконсин, додека двајцата кандидати се изедначени во Пенсилванија, покажува новата анкета на Си-Ен-Ен, објавена синоќа.

Помалку од една недела пред изборите на 5 ноември, демократката Харис води со 48 наспроти 43 проценти меѓу веројатните гласачи во Мичиген и со 51 наспроти 45 проценти во Висконсин – две од трите неопределени држави кои го добија прекарот „плав ѕид“ поради нивната клучна улога во победата на претседателот Џо Бајден над Трамп во 2020 година.

Во третата држава од „плавиот ѕид“, Пенсилванија, анкетата на Си-Ен-Е покажа дека Харис и Трамп се изедначени со 48 проценти. Со деветнаесет електорски гласови, Пенсилванија е една од најпосакуваните награди во борбата за Белата куќа.

Интервјуата се спроведени од 23 до 28 октомври преку интернет и телефон со 726 веројатни гласачи во Мичиген, 819 во Пенсилванија и 736 во Висконсин, објави Си-Ен-Ен. Маргината на грешка изнесува плус или минус 5 процентни поени.