74 милијардери во Москва, 62 во Лондон, 43 во Париз – каде живеат најбогатите Европејци?

Картата на европското богатство во 2025 изгледа поинаку од пред една деценија. Глобалната трговија, технолошкиот подем и новите политички трендови го променија балансот на моќта на континентот, носејќи нови „жешки точки“ за милијардерите и милионерите.

Москва останува градот со најмногу милијардери – 74 на број, додека Лондон брои 62 ултрабогати и над 227.000 милионери. Париз е третиот центар на богаташи со 43 милијардери и 165.000 милионери.

Во топ-листата се наоѓаат и Цирих со повеќе од 100.000 милионери, Женева со 74.200, како и Луксембург, каде БДП по глава на жител е рекордни 155.000 долари.

Најбогатите градови на „стариот континент“ не се само финансиски центри – тие привлекуваат научници, иноватори и претприемачи. Од Минхен и неговата технолошка сцена, преку Милано – модната престолнина, до Копенхаген и Стокхолм со зелената и дигиталната економија, богатството се шири низ различни индустрии.

Сè на сè, Лондон, Париз и Москва и понатаму ја водат трката, но нови градови како Амстердам, Барселона и Виена покажуваат дека европската мапа на богатството е во постојана трансформација.