Администрацијата на Трамп побара помош од воена база во близина на Чикаго за антиимигрантски мерки

Администрацијата на американскиот претседател Доналд Трамп побара од воена база во предградието на Чикаго поддршка за антиимигрантски акции, пишуваат денеска американските медиуми. 

Ова, сметаат американските медиуми, е индикација за тоа како би можел да изгледа проширениот опсег на антиимигрантските мерки во третиот по големина град во САД.

Министерството за внатрешна безбедност побара од поморската база „Големи езера“ „ограничена поддршка во форма на објекти, инфраструктура и други логистички потреби за поддршка на операциите на Министерството за внатрешна безбедност“, изјави Мет Могл, портпарол на базата, која се наоѓа 56 километри северно од Чикаго.

Барањето дојде неколку недели откако републиканската администрација распореди војници од Националната гарда во Вашингтон за борба против криминалот, имиграцијата и бездомништвото.

Два месеци претходно, со истата цел таа испрати војници и во Лос Анџелес.