Акциите на производителите на оружје скокнаа по убиството на Чарли Кирк

Акциите на производителите на оружје нагло пораснаа веднаш по атентатот врз конзервативниот активист Чарли Кирк, кој се случи во средата на универзитетски кампус. Овој тренд на пазарот често се повторува по инциденти со големо медиумско внимание, кога луѓето имаат тенденција масовно да купуваат оружје од страв за сопствената безбедност, но и поради можни ограничувања во продажбата.

Компанијата Smith & Wesson Brands од Тенеси забележа раст на акциите за 6,7 проценти во средата, а во четвртокот тие пораснаа за дополнителни 2,6 проценти во предтргувањето, пред повторно да паднат за околу 2 проценти по отворањето на берзата. Sturm Ruger & Company заврши со раст од над 3 проценти во средата и скок од уште 3 проценти по затворањето на берзата. American Outdoor Brands пораснаа за 5,3 проценти.

Посебно внимание привлече и малопродажниот синџир GrabAGun, во чиј управен одбор седи Доналд Трамп Јуниор, чијашто вредност на акциите скокна за 9,4 проценти истиот ден. Но, тие потоа паднаа за 4,5 проценти во четвртокот наутро.

Според професорот по право Дру Стивенсон, „индустријата за оружје има перверзни поттикнувања – продажбата и вредноста на акциите растат токму кога се случуваат вакви трагедии“. Тој потсети и на масакрот во основното училиште во Јувалде, Тексас, во 2022 година, по кој исто така беше забележан нагол пораст на продажбата на оружје.

Истражувањата покажуваат дека луѓето купуваат оружје по вакви настани од две причини – од страв од идни вооружени напади и како мерка на претпазливост во случај на воведување нови забрани за огнено оружје.

Чарли Кирк, влијателен конзервативен коментатор и основач на организацијата Turning Point USA, беше убиен во средата попладне за време на јавен настан на Универзитетот Јута Вели. Настанот беше дел од неговата турнеја American Comeback Tour.

Според полицијата, напаѓачот пукал од зграда на кампусот оддалечена околу 200 метри. До четвртокот војската и ФБИ сè уште трагаа по осомничениот, повикувајќи граѓани да споделат информации, фотографии и видеа од местото на настанот.

Пукањето предизвика бран реакции и осуди на политичкото насилство од двете партии во САД. Доналд Трамп го нарече Кирк „мученик за вистината и слободата“ и ја обвини „радикалната левица“ за убиството.

Извор: Forbes