Акцизите на горивата дури утре на Влада, ценовниот удар притиска

Акцизите на горивата дури утре ќе се најдат на владина седница, иако ценовниот удар врз бензинот и дизелот веќе се чувствува на пазарот, а Владата дури сега најавува мерка што треба да го ублажи растот. Премиерот Христијан Мицкоски изјави дека утрешната седница треба да донесе одлука за намалување на акцизата на дизелот за 4 денари по литар и на бензините за 2 денари, како дел од обидот да се ублажат последиците од кризата на Блискиот Исток и да се спречи посилен инфлациски удар.

Според Мицкоски, анализите покажале дека дизелот требало да поскапи за 7 денари, а бензините за 1,5 до 2 денари, поради што Владата решила да интервенира со намалување на акцизите. Тој рече дека, ако мерката биде усвоена, дизелот од понеделник би се коригирал за околу 3 денари, имајќи предвид дека истекува попустот на „Окта“ од 3 денари за дизел. За бензините, според неговата пресметка, би следело поевтинување од околу половина денар, а ако „Окта“ го продолжи попустот, корекцијата би можела да достигне и до 2,5 денари.

Во исто време, премиерот најави дека ќе продолжи и мерката со намалено ДДВ за горивата, кое сега изнесува 10 наместо 18 отсто, и тоа уште две недели. Дополнително, како што рече, Министерството за финансии анализира дали за дел од прехранбените производи што сега имаат ДДВ од 5 проценти, стапката би можела да се сведе на нула. Така, Владата сега зборува за антикризни потези и кај горивата и кај храната, но впечатокот останува дека овие корекции доаѓаат дури откако поскапувањата веќе почнаа да се прелеваат врз секојдневниот живот на граѓаните.

Мицкоски призна и дека намалувањето на акцизите ќе има последици врз буџетот, но оцени дека целта е инфлацијата да не стане двоцифрена, туку да се движи меѓу 4 и 5 проценти. На новинарско прашање за ребаланс на буџетот, тој рече дека Владата и натаму планира ребаланс во јуни, како што било претходно најавено. Засега, според него, нема да има ограничувања за тоа колку гориво можат да купуваат граѓаните, бидејќи и покрај зголемената потрошувачка, количини има доволно. Но токму тука останува и главната дилема: дали мерките што Владата допрва ќе ги разгледува се навремена заштита или задоцнета реакција на криза што веќе ја плаќаат граѓаните.