Skip to content
Доколку ви се случува често да добивате модринки и по најмал удар, причината можеби не е невнимание, туку недостаток на важен витамин во организмот – предупредуваат експертите.
Според стручњаците, лесното појавување модринки може да биде знак на нутритивен дисбаланс, а најчесто се поврзува со недостаток на витамин Ц.
Модринките, кои можат да бидат сини, кафеави или виолетови, настануваат кога ситните крвни садови под кожата пукаат, при што крвта се излева во околното ткиво. Иако во најголем број случаи не се причина за загриженост, нивната зачестеност и начинот на појава можат да укажуваат дека на телото му недостигаат важни хранливи материи.
Улогата на витаминот Ц
Доколку ви се чини дека модринките се појавуваат „од ништо“, тоа може да биде знак за сериозен недостиг на витамин Ц, предупредува париската натуропатка Лиди Палмири за списанието Vogue.
Витаминот Ц, кој најмногу се наоѓа во зеленчук како брокула, кељ и прокељ, како и во овошје како јагоди, гуава и цитрусни плодови, е силен антиоксиданс и има клучна улога за здравјето на кожата, коските и сврзното ткиво. Тој го поттикнува заздравувањето и помага во апсорпцијата на железото.
„Човечкото тело не може само да произведува витамин Ц, ниту пак може долгорочно да го складира, па затоа е неопходен негов секојдневен внес“, нагласува Палмири.
Препорачаната дневна доза изнесува околу 75 милиграми за жени и 90 милиграми за мажи, а најдобро е да се внесува преку свежо овошје и зеленчук. Термички обработената, замрзната или конзервирана храна содржи значително помалку витамин Ц.
Доколку исхраната не е доволна, може да се користат и додатоци во исхраната, но експертите предупредуваат да не се надминува дневната граница од 2.000 милиграми.
Не е секогаш виновен само витаминот Ц
Иако денес недостатокот на витамин Ц е релативно редок во развиените земји, тој сè уште се поврзува со неурамнотежена исхрана. Според д-р Хауард Е. Левин од Harvard Health Publishing, иако скорбутот е најпознатата последица од дефицит на витамин Ц, лесното појавување модринки може да биде и резултат на недостаток на цинк или витамини од Б-комплексот.
Дополнително, ваквите појави можат да бидат поврзани и со:
- земање лекови за разредување на крвта,
- стареење на кожата,
- употреба на кортикостероиди.
Кај потешки случаи на недостаток на витамин Ц може да се појават и други симптоми, како што се крвавење на непцата, замор, бледа и безживотна кожа, чести инфекции, необично виткање на влакната и ситни црвени точки околу фоликулите на влакната.
Експертите советуваат дека доколку забележите вакви симптоми, најдобро е да се консултирате со лекар и да не донесувате заклучоци на своја рака.