Skip to content
Албанскиот министер за одбрана Пиро Венгу соопшти дека денеска во земјата се активни 30 пожари, од кои пет се најкритични. Тој нагласи дека продолжува максималниот ангажман од земја и воздух и им се заблагодари на партнерите што испратија помош.
„Покрај противпожарните единици, армијата, полицијата и доброволците, во акцијата учествуваат еден ‘Канадер’ од Хрватска, два авиона PZL од Грција, два ‘Блек Хок’ хеликоптери од нашата армија, по еден од Чешка и Словачка и два од Обединетите Арапски Емирати“, изјави Венгу од Поличан, каде што ја следеше ситуацијата на терен.
Министерот посочи дека најкритични жаришта се во Поличан, Рогожина (Каваја), Сири и Каљтер и Зал-Хер кај Тирана. „Во овие моменти, во Зал-Хер се води силна битка со пламените јазици. Пожарот е помеѓу два армиски објекти… ќе се истражи детално,“ рече Венгу, додавајќи дека дел од пожарите се намерно подметнати, а други реактивирани поради неможност да се контролираат сите опожарени површини по гаснење.
Екстремните услови ја влошуваат сликата: температури над 40°C, ветер и непристапен терен го отежнуваат гаснењето. Во неколку населени места е извршена евакуација на жители, а над 100 туристи се извлечени од Сири и Каљтер, заштитено природно богатство.
Надлежните апелираат за максимална претпазливост и стриктно почитување на забраните за палење оган и движење во ризични подрачја.
