Албанија под вода: една жртва во Драч, евакуации по Вјоса

Едно лице е пронајдено удавено во албанскиот крајбрежен град Драч, откако повеќедневните обилни врнежи предизвикаа поплави и активираа итни интервенции на службите. Според информациите од албанското МВР што ги пренесува Ројтерс, станува збор за 55-годишен општински работник кој бил пријавен за исчезнат и бил најден во одводен канал, најверојатно однесен од водата.

Невремето ја погоди најсилно западната и југозападната зона, каде што екипите за спасување со чамци извлекуваат жители од поплавени куќи во поширокиот реон на Фиер и Валона, поради нагло зголемување на водостојот на реката Вјоса, која, според Министерството за одбрана, се искачила над 9 метри.

Во самиот Драч, локалните власти свикаа состанок на Комитетот за цивилни итни состојби поради оценката дека градот е меѓу најпогодените, со поплавени улици и објекти, па дури и проблеми во затворот, каде што дел од ќелиите биле наполнети со вода.

Во паралелни изјави за албански медиуми, министерот за одбрана Пиро Венгу наведе дека околу 800 домови биле поплавени во Драч и дека 180 жители биле евакуирани и сместени во објекти за привремено згрижување.

Координацијата на терен се води преку оперативната сала на Националната агенција за цивилна заштита, со континуирано следење на ситуацијата во Драч и Лежа, распоредување механизација и сили, и евакуации таму каде што е потребно. Во Драч и Шијак, според истите извештаи, биле евакуирани и семејства од најризичните зони, а општините биле ставени во состојба на „целосна готовност“ поради најавите дека врнежите ќе продолжат.

На југот, Министерството за одбрана издаде и итно, службено известување за непосредна евакуација во општина Валона, конкретно во административната единица Новосела, поради „итен ризик по животот и здравјето“ од поплавите. Во известувањето се наведува дека евакуацијата стапува на сила веднаш, со приоритет за деца, стари лица и лица со попреченост, и дека згрижувањето ќе се организира преку локалните служби во координација со полицијата и здравствените структури.

Метеоролошките и хидролошките служби во Албанија претходно предупредија дека ризикот од поплави и свлечишта расте во повеќе окрузи и дека поројните водотеци може брзо да излезат од коритата. Според Институтот за геонауки, врнежите продолжуваат, а во повисоките предели дождот може да премине во снег, што дополнително го комплицира пристапот и интервенциите во планинските области.