Албанските студентите по медицина продолжуваат со бојкот на наставата

Студентите по општа медицина во Тирана, кои нова академска 2023/24 година ја започнаа со бојкот, петти ден по ред не посетуваат настава.

Студентите избраа да протестираат за укинување на новиот закон со кој се принудени да даваат здравствени услуги од три до пет години по завршувањето на студиите, а дури потоа да ги добијат дипломите.

Денеска им се придружи и околу 400 бруцоши, кои требаше редовно да почнат со настава.

Студентите и денеска најавија дека случајот ќе го водат по законски пат и ќе поднесат тужба до Уставниот суд.

Тие и претходно протестираа во знак на незадоволство од законот, а барањето и несогласувањето со истиот му го пренесоа и на шефот на државата, Бајрам Бегај..

Владата го подготви овој закон поради масовното заминување на белите мантили, пред сè во Германија и во Италија, поради што се чувствува голем недостиг на овој кадар. Нивните здруженија тврдат дека во изминатите години земјата ја напуштиле над 4.000 лекари, меѓу нив и голем број специјалисти, како и над 10.000 медицински сестри.