Апсењето на Мадуро предизвика нов рекорд на златото

Цената на златото порасна за околу 2,2% и се искачи на приближно 4.424 долари за унца, откако апсењето на венецуелскиот претседател Николас Мадуро ја засили нервозата на инвеститорите и го пренасочи капиталот кон „безбедни засолништа“. Во исто време, среброто порасна за околу 3,9%.

Додека благородните метали добиваа на вредност, нафтата се повлече, а берзанските индекси во Европа и Азија претежно бележеа раст, во услови на брза проценка на новиот геополитички ризик и неговите потенцијални реперкусии врз трговијата и енергетските текови.

Пазарниот контекст е особено чувствителен по рекордната 2025 година за златото и среброто. И покрај падот кон крајот на декември, златото го забележа најдобриот годишен резултат од 1979 година, со раст од над 60% и рекордно високо ниво од 4.549,71 долари на 26 декември. Како клучни двигатели се наведуваат очекувањата за пониски каматни стапки, купувањата на централните банки и зголемената глобална неизвесност.

Кај нафтата, вниманието се префрли на прашањето дали интервенцијата на Вашингтон во Венецуела може брзо да ја промени понудата. Брент се спушти на околу 60,26 долари за барел, додека американскиот претседател Доналд Трамп изјави дека САД ќе ги искористат венецуелските резерви и дека ќе „ја водат земјата“ додека не се обезбеди транзиција.

Сепак, дел од аналитичарите предупредуваат дека непосреден ефект врз енергетските цени би бил ограничен, затоа што обновата на венецуелската нафтена инфраструктура би барала огромни инвестиции и време, а производството со години е ниско и, според проценките, изнесува околу 1% од глобалното.