Арсовска му возврати на Мицкоски: „Ако ѓубрето се решава за 72 часа, зошто не беше решено порано?“

Градоначалничката на Скопје Данела Арсовска жестоко му се обрати на лидерот на ВМРО‑ДПМНЕ, Христијан Мицкоски, повикувајќи го да престане со „политичките налози и медиумските напади“ и да покаже конкретна соработка во решавањето на проблемите со јавната чистота.

„Проблемот со ѓубрето е апсолвирана тема. Заедно со вашите кадри вие го креирате хаосот, а потоа ветувате дека ќе го решите за 72 часа. Ако навистина е толку лесно, зошто не го направивте тоа досега?“ изјави Арсовска, додавајќи дека повикувала на соработка во интерес на граѓаните, но дека честопати останала без одговор.

Градоначалничката директно го прозва Мицкоски за пристапот кон локалните проблеми и за начинот на политичко делување: „Многупати те повикав да соработуваме. Ако нешто може да се среди за 72 часа, зошто не беше средиено во изминатите четири години?“

Арсовска го критикуваше и, како што рече, „дипломатското лобирање“ кое се водело околу темата Чаир, и посочи дека по месеци тензии меѓу партиите, сега – откако коалицискиот кандидат добил поддршка во Чаир – Мицкоски би требало да покаже конкретни чекори за подобрување на безбедноста и услугите за граѓаните.

„Се прашувам дали сега ќе бидеш лидер како Еди Рама и ќе отстрануваш сѐ што не е безбедно за скопјани, или сè уште не смееш да им писнеш на одредени луѓе?“ рече градоначалничката, aлудирајќи на повиците за посилни мерки против нерегуларности.

Арсовска исто така ги потсети институциите дека по пријава на партиски кадар, финансиската полиција и Министерството за внатрешни работи можеле „експресно да интервенираат во рок од два дена“ — покажувајќи, како оцени, дека брзи и целосни реакции се возможни кога постои политичка волја. Таа напомена дека самата подолго време пријавувала проблеми во Чаир и дека очекувала заедничка акција со институциите.

На крајот, Арсовска упати директен предизвик: „Ајде да отидеме заедно и да го покажам криминалот лично. Let’s go!“

Од кабинетот на градоначалничката најавија дека во наредните денови ќе следуваат дополнителни објави и конкретни предлози за соработка со опозицијата и државните институции за решавање на проблемите со јавната комунална служба.

Фото: Фејсбук Данела Арсовска